米高有話兒

AirAsia 名句：「搭飛機平過搭巴士」已漫延到內地，搭巴士去桂林，10 小時 RMB220；搭飛機去桂林，1小時$129！ 仲要係服務一流的深圳航空，去桂林玩，平過去迪士尼！XD

難得禮拜六唔駛做公司野，懶理天文台話今日會落雨，一早去大學站跳上船一個人去東平洲兜個圈。咁大個仔今次係第二次去，上次時間關係淨係行左少少就走，今次決定要環島一周！

人唔算多，我去影相時都好少撞到人，一條友冇野做走去海邊練片石，練左一個鐘後總算係有 D 成積！好眼訓，唔打喇，下次先繼續講。最後一件事，就係全日行山時都冇落雨，但一上船回航就開始落，Thanks God!

難得星期日留起珠海又冇野做，一早八點起身就決定去澳門行下（冇錯，好即興，今朝先突然想去），原來星期日去澳門唔係好日子，起拱北排隊等過關等左兩個鐘，人多到乜咁，真係只要入面有人跌低就隨時出意外死幾百人咁嚴重。過左關，已經十點半，我一心都係諗住黎 relax，冇左幾個鍾咪睇少幾個景點囉，唔趕唔趕。

拎左張地圖就開始漫遊澳門，真係好「漫遊」，行得到就行去睇，可能行行下有巴士，睇到佢目的地合心意，就即刻跳上去，咁樣的遊覽，最適合我！景點唔介紹喇，一定有其他講得好過我的 Blog。以下係今日主要行程：

1. 關閘搭巴士去媽閣廟
2. 媽閣廟旁的緬甸食店 lunch
3. 行去大三巴
4. 途中經過幾個教堂、無數特式店鋪、小食等
5. 大三巴前的手信街食免費野
6. 行大三巴後的山
7. 發現澳門博物館後內進參觀
8. 博物館旁的炮台山
9. 手信街（非食物部份）買斜孭袋
10. 行落大馬路塔巴士去路環黑沙海灘
11. 漫步海灘
12. 坐石睇浪
13. 坐石聽浪睇書
14. 再漫步海灘
15. 去海灘旁小食店食炭火燒
16. 搭巴士到氹仔
17. 漫步氹仔市集
18. 食大菜糕、榴蓮雪糕
19. 去大利來食牛筋面冇牛筋、牛腩面冇牛腩、最後要魚蛋面
20. 再起氹仔行下手信街，食免費杏仁餅
21. 搭巴士去大馬路
22. 參觀賭場
23. 搭 Wynn 免費巴士去關閘
24. 又等個幾鍾（7:00 - 8:30）去返珠海

後記一：知道自己好勝心強，以前試過玩老虎機停唔到手，所以而家出絕招：拎 $20 擺褲袋，銀包連袋交俾酒店 Keep 起佢！呢招都好有效，希望下次係拎埋銀包入去都控製到自己淨係玩 $20。

後記二：眼見一個人黎澳門只有兩類人 - 賭仔同影相佬，好似冇我呢 D 無聊人黎澳門純粹行下

後記三：原本想去 Watson’s 買剃鬚刀片，入到去見內地人係咁掃 Watson’s D 香港貨，條隊長到乜咁，嚇走左

後記四：用 Sanyo 影左 D Snapshot, 擺左上網遲下先加返 Description

[ 媽閣廟前的人力車 ]

[ 假日文藝表演，載歌載舞幾好睇 ]

[ 一直都好唔明，點解旅遊成市禮拜日會有咁多食市閂門休息 ]

[ 一個人旅行時最最最無聊的舉動 - 自拍 ]

[ 連幾多點起屋企都要寫埋，搵食艱難呀 ]

[ 博物館一景 ]

[ 呢碌炮對住邊個外敵？！ ]

[ 噢...... 嘩...... ]

[ 黑沙海灘 D 沙真係黑色的 ]

「無錢去玩」，一本講三個人，三萬元，足以實踐一個夢想中的計畫，一個所有人都認為不太可行的計畫──到日本旅行四十二日！得閒行過書局，唔買都拎黎揭吓啦，我好俾心機做排版架！第一次幫博益做排板，亦係最後一次，原因前幾日已交代過，佢賺緊錢都要執笠呀！人地冇錢，都要去日本玩，南早咁有錢，都摺埋博益唔玩，唔好話我知，佢想將博益轉做金融集團呀！

四十二日旅行，我整左四十二個版面設計，原本係諗住睇完佢地果日做過啲乜再將內容融入設計中，但可惜最後果幾日… er… 可以話我同佢地冇左感通，好難搞，反覆地睇佢地果日做咗啲乜，幻想佢地既心情，但有時坐左成個鍾，都落唔到筆。可能我生手（以前都係整 Product Catalog），又可能因為我跟本唔熟排板（其實我讀工程出身，電車男一名），不過點都好，呢本書真係擺足心機整架（雖然有時一邊整一邊鬧）！

下次，下次一定會更加好。（冇三個月時間俾我真係好難搞）

舊年起紅磡碼頭舉辦時因為太遲去拎飛所以拎唔到，果陣已經同自己講，出年一定要第一日朝早去拎飛！今年終於可以去睇喇！（多謝 MK 去 Tom Lee 拎飛）星夜嘛…… 我諗香港空氣應該唔許可喎，不過唔緊要啦，有得聽已經好好喇！

太古《港樂‧星夜‧交響曲》
康樂及文化事務處協辦

憑票免費入場
30-11-2007 星期五 晚上七時(觀眾可於下午五時開始進場)
跑馬地馬場遊樂場