冷飯菜汁
君不須防人不肖，
眼前鬼卒皆為妖；
秦王徒把長城築，
禍去禍來因自招。
舊到冇人在有興趣的籤文，我反而有興趣拎出黎講講，大家也對是次事件很不滿，主要是因為：
1. 你個劉皇發憑乜野去幫香港人求籤，而家求左支咁嘅返黎，點算？你受返佢算啦！你話你係咪累街坊丫？！
但其實求籤者，只是求神明指點迷津，正如一份身體檢查報告，你沒有理由去責難幫你打開身體檢查報告的人吧？
2. 你個解籤佬擺明講大話啦，支籤邊係咁解架？佢開大眼講大話，簡直有辱神明！
籤文永遠也隱藏玄機，機解簽佬從來也是睇住個「老細」黎講的，幾下下的，也會有一線生機，幾上上的，也沒有座定粒六的把握。試問啦班榮升專家的路人甲乙丙，又有幾多個係真正參透到籤文？其實，都係一支籤文，各自表述。
我夠可以將籤文作以下解釋啦：
君不須防人不肖
今融海潚已經發生咗，而家先話黎防，遲唔遲 D 呀？
眼前鬼卒皆為妖
日日起電台電視報紙見到果班財經演員，冇個好人，唔好理佢地呀！
秦王徒把長城築
雖然日日話通街平貨，匯豐好抵，但你班市民築起血肉長城，有乜用？大戶一殺就殺晒你地啦
禍去禍來因自招
呢 D，咪叫做…. 「有咁耐風流，有咁耐折墯」 – by 梁錦松
不過慘嘅係大戶風流，散戶折墯。但炒股輸身家的，是否值得可憐？我有保留，不竟是出於貪念。
**以上只是亂解一通，旨在証明籤文真係可以好多種解法。
總之，籤文就求咗出嚟，點面對佢係每一個人內心的問題，每個人也可能有不同的睇法，有不同的應對措施，內省不疚，夫何憂何懼？香港人精神，就係要逆境自強嘛，吓吓叫阿爺，求中央，好丟架！