米高宅生活字典

夜晚睇亞視 24 小時新聞台，講到北京大霧，機場都被濃霧掩蓋著，導致有多班由香港飛往北京的航班延時，記者在香港機場內訪問了幾個旅客，其中一個令我印象最深刻。

該女士因為未能上機，所以找職員理論，女職員連忙遞上餐卷希望該女士可以體諒，可以用等飛機的時間來吃點東西，以示補償。怎料該女士態度囂張，一手撥開了餐卷，對著鏡頭怒吼：「我唔係希罕你果Ｄ餐卷，我淨係要去北京，你地講黎講去都係用北京天氣惡劣黎做理由，根本就係藉口，或者飛機都走得，點解唔俾我去北京……（下刪 100 字）」

阿嬸，你估人地唔想起飛呀? 延遲左幾班航空公司都有損失架！咁北京真係大霧，飛唔到嘛！天氣呢Ｄ野冇人可以控制，冇人可以避免，唔通航空公司專登整Ｄ霧出黎等你返唔到北京咩！航空公司俾Ｄ餐卷你，根本又唔係要你「希罕」，只是對你的一種歉意，你一黎就話「係希罕你果Ｄ餐卷」，搞到好似「此地冇銀三百兩」，越講越衰。飛唔到去北京心情係差，但係都唔洗對住鏡頭講埋晒Ｄ唔經大腦嘅野，其他飛機唔係去北京梗係走得啦，唔通 Oasis 架飛機見港龍果架冇得走咁悶，留低一齊陪佢等咩！

對住朋友發下呢Ｄ牢騷我唔怪你，最多Ｄ人淨係會覺得你搞下氣氛娛樂下大眾，但係你而家係對住電視台鏡頭，同緊全華南觀眾「拜年」呀！你整Ｄ咁嘅對白出黎，觀眾都唔知讚你識搞氣氛好丫，定係話你上位成功。新年又大一歲喇，希望你遲Ｄ睇返自己嘅錄影之後可以成熟返Ｄ啦！