AIA 環球嘉年華 （上集）
上星期六（6/1/2006）同 Taylor 去左金鐘添馬艦的 AIA 環球嘉年華，我地六點幾去到，可能Ｄ人仲食緊晚飯，唔算好多人排隊。今年佢地既入場政策同舊年唔同，已往全部機動遊戲係按次收費的，Ｄ代幣都要逐個買，但係今年有Ｄ唔同，俾 $180 入場費就可以任玩所有機動遊戲，仲連埋 45 個代幣，入到去玩晒Ｄ代幣先再用 $5 逐個買。因為我地唔會玩太刺激既機動遊戲，所以可以選擇既剩返唔多，咁都冇壞既，可以重點玩多Ｄ我地鍾意既機動遊戲。
預計到夜晚Ｄ機動遊戲一定會有好多人排隊玩，到時真係俾錢入去排隊，所以我地一入到去就玩左Ｄ機動遊戲先，夜晚想玩多次既時候先再排隊。以下係我地玩過既機動遊戲：
- 老鼠也瘋狂
食飽左既人應該唔好玩呢個住，唔係太刺激既關係，而係Ｄ食物隨事會俾Ｄ向心力轉返出黎。起呢Ｄ流動嘉年華玩過山車既刺激之處，唔一定係貪佢既上上落落，感受佢既「臨時搭建」同埋「簡單組裝」都好過癮，整條軌道都係用木方墊底的，車卡經過銜接位時，你會感覺到條軌道既震蕩。遊戲初段都唔錯，都係一Ｄ簡單既上上落落，適合一家大細，不過接近尾段時，車卡在一個轉彎位後開始不停自轉，轉得都幾猛下，你會感覺到少少被抽出既感覺。但係，自轉既時間實在係太長喇，中間冇Ｄ休息既時間，就係咁一路轉到尾，情緒亦都由原本既「過癮興奮」轉左做「轉完未呀，開始暈喇」。落車後，仲有Ｄ天旋地轉。如果係情侶想玩呢個遊戲，一定要早入場（6:00 – 7:00）冇乜人時玩，咁先可以兩個人一架車，夜晚多人時就會四個人一架車，乜溫馨感覺都冇架喇！注意注意。 - 靈異火車
佢應該改錯名，唔係火車黎架，係一架架兩座位的人力車，車頭係一個中國古代男人模樣既公仔做拉車，遊戲入面既裝飾都係一Ｄ中國式既人，或者係Ｄ神佛咁，身為中國人既我，真係唔覺得恐怖，可能係因為呢Ｄ尖眼既人我地日日都見，同睇Ｄ古書入面既插圖差唔多，如果去到係有好多人排隊的話，建議唔駛去玩，不過冇乜人的話，入去坐坐當係休息下都唔錯。最正既人，起我地排緊隊時工作人員無端端用膠條封左一架車既門，再陰沈沈咁同後面果對情侶話：「對唔住，呢架車唔係俾我地坐的。」（好似暗示緊係俾「果Ｄ」野坐），笑死我！情侶注意，呢個係少數一定可以兩個人一齊玩既機動遊戲之一。 - 摩天輪
如果你早入場，可以去玩玩先，因為真係冇人排隊，雖然夜景係靚Ｄ，但係唔駛排隊就可以玩一次，都唔會浪費你好多時間，不過就算係冇人排隊，工作人員都會安排 4 人一車，佢地解析係因為要保持車卡平衡。情侶注意，因為傍晚 6 點都冇乜機會有 2 人一車，所以你都唔好諗住上到去可以「幸福摩天輪」，但係夜晚去的話，就要 6 / 8 人一車，到時真係個個都只可以反身向窗望，避免同對面既人有眼神接觸，減少尷尬。 - 電動碰碰車
排 5 – 15 分鐘就可以玩，都幾好玩架，可以成班朋友一齊互撞，或者撞一Ｄ完全唔識既人。架車要行一端路先會加速，所以如果你想用最大既力度去撞人，每次撞完之後，俾架車行一行先，回回氣，咁再去撞人就可以好大力架喇！如果遇到塞住既情況，架車其實係可以退後的，方法係將方向盤轉 360 度，咁原本向前既車轆就會變向後，再踏油門架車就會向後架喇。玩完一次如果覺得正既話，要即刻去返排隊，因為你一出黎，其他人就入去玩，條隊一短左，好快就會有其他人黎補充返，如果你唔即刻入返去排，你就要等耐好多。情侶注意，架車雖然可以坐兩個人，但係唔建議咁做，明明可以一人一車，唔好徙左個機會，況且追住對方黎撞都好好玩呀！ - F1 滑梯
唔好以為玩滑梯好傻仔，起 3 層樓咁高冼落黎都幾過癮架，同埋中途有Ｄ波浪，成個人好似拋起左咁。冼落黎已經好玩，行上去仲過癮，行起去既「樓梯」只係一Ｄ好簡單既鋼板，好薄，踏上去既時候好似就黎穿咁（其中有一塊真係穿左），真係一步一驚心。呢個遊戲由於只要唔駛 30 秒就完成，所以Ｄ人都去得幾快，唔駛點排隊就可以玩。情侶注意：雖然可以兩個人起相連既滑道，但係唔駛旨意兩個人手拖手甚至攬住咁滑落黎，因為你係要坐起一塊特製既坐墊上面，雙手緊握安全帶，乜小動作都唔可以做。
AIA 環球嘉年華： http://www.hkworldcarnival.com/
下回預告：我地玩過既攤位遊戲