加班
（流水式記事，冇內函）
星期五返內地加班（五、六、日），十點返到去先知已經停咗電，仲要停一日，呢 D 就叫黑仔！
返到屋企，我唔知點形容好，成個廚房假天花塌咗落黎，冇一件廚具係起原位！全屋樹枝樹葉，水跡斑斑，一心想收拾殘局先發覺冇水冇電。OK，一定係個天要我放假唞唞，放低 Notebook 就直去樓下搭車去拱北。
過關去咗澳門食黑椒燒鵝比飯，一流呀！原來澳門平時係咁旺的，以前禮拜六日去隨了手信街外 D 店鋪都閂晒門，終於睇到平時澳門的繁榮！食完飯諗住去黑沙灘行吓，去到以為自己參觀緊堆填區，風後情況慘不忍睹：沙石流走，海灘變石灘，同珠海有得揮！
其實我都唔知黎澳門做乜，所以都係見車就上。搭返車出去路環市區，食下野、睇下野；再搭返車去氹仔市區，又食下野、睇下野。睇睇時間，五點黎緊，搭車去關閘走人。過關時發現，而家去澳門買手信，已經唔再係牛肉乾、杏仁餅，而變成嬰兒奶粉、幼兒奶粉。
