米高宅生活字典

宅到某個境界,也是一種生活態度

觀塘的沙爹王

leave a comment »

小弟起牛頭角返工,以前經濟能力仲未好似而家咁差嘅時候,日日中午都同老闆加同事一齊出去食飯。行到觀塘郵局前一條街, HSBC 對面有一棟商住樓宇,下面開左好多食肆,其中一間係沙爹王,我地都經常幫櫬。

唔好以為沙爹王真係專門食沙爹(我以前真係以為咁,大大話話都俾佢呃左十年) ,入面菜式我諗沙爹佔 1/4 都冇,不過大部分都係東南亞嘅風味,例如咖哩、白咖哩、冬蔭公等等。沙爹王提供左好多套餐,有辣有唔辣,有米有麵。如果你唔想要套餐,都可以自己散叫,全部價錢都幾平民,龍蝦湯都係 $12,魚翅撈飯都係 $3x。起佢地咁多樣食物入面,我最喜歡食嘅,並唔係佢招牌菜,亦都唔係精算套餐,而係自選配搭嘅麵食:清湯牛肉米線。

所謂清湯,只係唔辣同埋色水幾清澈。味道方面,一D都唔淡,你可以睇到有好多牛肉嘅纖維起裡面,入口肉味都幾濃,幾甜架。佢地嘅牛肉,水準都唔係太統一,有時好軟滑,有時就好韌。跟住碗麵上檯嘅,仲有一少碟自加配料:青檸同埋生嘅紅辣椒粒。呢個,就係我鍾意佢嘅地方。唔好睇佢少少一碟配料,佢可以令到個面昇華去第二個境界。好多同事都問我點解去沙爹王叫清湯,其實,我都係為左呢一少碟野。

原本一碗平平冇奇嘅清湯牛肉米線,加左辣椒之後,香味撲鼻。同平時食果D辣嘅米線唔同,因為果D米線隨左辣椒,仲有其他辣味嘅調味料。調味料雖然係香,但係完全唔可以同淨係落辣椒嘅麵相提並論。落完辣椒,記住落埋果半個青檸去碗麵度,令碗麵散發出清新嘅青檸味,食落口少少香辣,少少麻,少少酸,好醒胃的。

注意: 嗜辣者對呢個食物唔好抱咁大祈望,因為辣椒分量少,落晒去碗麵度都係微辣,可能滿足唔到你嘅要求。

沙嗲王
地址:觀塘裕民坊34-36號1樓
電話:2304-1879
消費:$30 起

Written by bearyung

January 14th, 2007 at 10:32 pm

Posted in Uncategorized

Tagged with

Leave a Reply