我聽錯，我睇錯，我理解錯?
關於四歲小童跌落水池保安阻止救人事件，講出黎真的天怒人怨，不過事隔一日，情況出現重大變化，大家首先睇下第一日有關事件的報導：
十一月二十四日《東方日報》
「Ｄ保安員唔救人就算喇，仲要阻頭阻勢，唔係佢阻止，一定可以救番個細路 …… 」對於有保安員阻撓救人，街坊齊聲譴責。
曾落水救人的姓盧街坊對保安員的做法，忿忿不平，他指一名女保安員怒罵：「就係佢，阻住我救人。」對於「偉仔」命懸一線，他十分傷感，表示認識「偉仔」的外婆，兩家人十分稔熟。
盧稱，事發時有小童跑到公園向母親說：「有小朋友跌落水！」其母當時不信，還叫兒子不要說謊，其後再有多名小童告訴父母有人跌落水，他於是大聲問：「有冇人唔見小朋友？」「偉仔」的外婆回應不見了外孫，大家立刻趕到池邊查看，不料竟被保安員阻攔。
呢班咁「見義勇為」嘅街坊當日一齊指責保安員唔俾佢地去救人，任何人聽到都覺得氣憤難平，人命喎大佬，冇野緊要得過人命，點解可以咁冷血?!
一天之後，東方日報標題叫《「對得住天地良心」女保安堅稱無做錯》，淨係睇標題心諗，你個冷血屠夫，阻止救人仲話自己「對得住天地良心」，俾你活多一日就真係天冇眼，睇埋內文，嚇左一跳，原來事情始末根本就唔係街坊講嘅咁！
十一月二十五日《東方日報》
甄婦在區議員蘇愛群陪同下，與指摘她阻撓救人的居民盧先生當面對質。
甄表示，她聽到有人叫小孩跌落水池，即時用對講機通知同事及趕到水池，探頭落水池查看，可惜因水濁和天黑，並無發現，後來聽見有人大叫快些閂水掣，始匆匆走到泵房閂掣。
幾分鐘後甄閂掣出來，已見男童被救起，由於圍觀坊眾太多，她按主管的指示控制人群，叫街坊不要太接近，以免阻礙救援，相信有後排街坊不知情才引起誤會，她昨日理直氣壯稱：「成件事對得住天地良心。」
竟然而家唔認阻止救人，話閂完水掣出黎細路已經俾人救左上黎? 同尋日街坊所講好大出入喎！唔緊要，好彩我地仲有當時人指摘她阻撓救人的居民盧先生出黎講返真相：
十一月二十五日《東方日報》
盧先生亦解釋從未講過有保安員阻撓救人，他強調當時保安員只阻止男童的外婆落水池，因擔心她年紀大，恐救人不成反出事。盧也向警方落了口供，相信另一救人英雄曾先生亦會與警方聯絡。
咦咦咦?!吓吓吓?!喂喂喂?! 我聽錯，我睇錯，我理解錯? 我明明睇到咁多份報紙頭版你係用右手第二隻手指篤住果位保安員話佢阻住你救人喎，咩冇講過? 點解由阻止你救人變左阻止細路阿婆救人? 你尋日記者面前俾個阿婆上身? 大佬，阻止阿婆跳落去救人好正常喎，阿婆唔曉游水，佢跳落去唔係救人，係等人救！盧先生，你知唔知道事發時你的一句話，令全香港有幾多百萬人連夜咒罵果位保安員，果位保安員已經變成過街老鼠，出街俾人認到隨時被打！
就係你一句：「就係佢，阻住我救人。」令保安員慘成繼陳健康後的第二個人辦，你今日竟然話冇講過?！你莫非拜左董伯伯為師，佢傳授左Ｄ「八萬五」功力俾你?仲有尋日起附近講到繪影繪聲的街坊甲乙丙，你地去晒邊? 點解全部都話保安冇講過? 你地事發之後講到個個都好似親臨現場，身歷其境，斬釘截鐵話保安阻止救人? 你地真係睇到佢有咁做嘅，唔該快Ｄ聯絡警方錄取口供，如果唔係嘅，唔該唔好亂講。
報紙標題《「對得住天地良心」女保安堅稱無做錯》應該改做《「對得住天地良心」女保安堅稱無做過》，在此希望男童可以渡過難關，早日康復，更希望女保安和盧先生最後所說的是事實真相，讓我知道世界未至於如此冷血，也希望眾街坊積積口德，當係幫男童祈福吧！
