米高宅生活字典

宅到某個境界,也是一種生活態度

超老土:2011回顧及2012願望(個人版)

leave a comment »

其實呢D野應該係起2011年12月31日11點59分post上黎先有意思,又或者係起1月1號擺上黎都叫合情合理。再唔係起年廿九同埋年初一之間post,都叫解釋到,而家年初三先黎打呢篇野,算甚麼意思?

其實我諗甩文甩左咁多個月,應該都唔會有人黎睇,所以時間已經唔係一個問題。點都好,都要寫返低自己過去一年(其實都係最後個幾兩個月,耐D嘅都已經唔記得)做左D咩同埋黎緊一年有咩想做咁啦。

1.
因為油麻地百老匯電影中心裝修延期延期又延期,所以2011年我係睇唔夠24套電影,不過,百老匯電影中心個會籍亦都因為裝修關係,所以自動延長到2012年嘅4月,即係話,我仲有得追!

其實都係有想睇嘅電影先去睇,並唔會為儲夠24套「回本」而入場。睇個勢,《我的華麗皮囊》好大機會係我想睇而最後預唔到時間去睇嘅一套,如果真係咁,唯有等BC Sunday。

2.
好耐都冇煮過野食喇,因為近排太忙,連搓麵粉嘅興致都冇,2011年下半年太少時間煮野食,希望2012能夠做好D。

3.
2011年繼續不溫不火地幫一兩本書做封面設計、內文設計同埋排版。繼續Keep住呢個速度就OK,太多我又做唔切,太少又驚自己技術荒廢。好似活地阿倫咁,一年一部,good fit。

4.
自從 Apple 幫 iPhone 出左 Siri,我就已經想走,電話係溝通工具,你明明對住電話講野但係又唔係溝通緊,同我嘅理念唔相符,最危險係你講嘅所有野,其實 Apple 都會存儲起 data center,佢要起你底,肯定快過高登起底組十萬倍。起 2011年尾,成功地由 iPhone 陣營,轉為「Connecting People」的 Nokia 陣營。

為 Windows Phone 寫的兩個 Apps,也有不俗成績,其中一個更榮登香港及台灣「Free App」榜首達一周之多,總算是一點小 成就吧。2012年應該都係繼續為Windows Phone 寫App,期望有更多的第一陸續出現吧!

5.
我一直都覺得丟你去日本一年你就自自然然識講日文,同樣道理,起工作需要下,2011年一口氣學識左 VB6 同埋 C# + WCF + WPF,跟住唔知點解,又識埋 Oracle -> EJB3 -> WebService -> .NET -> WPF 呢條路,技術層面正式由以前嘅 Enterprise Web-based Application 轉為 Retail Server Client Application。

2012 年,希望可以 design 一個 Enterprise Web-based Application + Retail Server Client Application 嘅infrastructure 出黎,咁就係一套完整 system 喇。

6.
Crafting 都丟低左好耐,希望 2012 可以 pick up 返,其中皮革、紙品都係主要目標。卡片同埋請柬、喜帖設計將會係主線,皮革方面亦都希望可以製作更多實用小物。

7.
2011年發現菲林機都係冇時間去玩,品質幾好、做工幾好都冇用,影完都冇時間去晒。所以2012年將會逐步退出菲林市場,全面數碼化。

8.
起2011年為左慳返幾千蚊執左自己間公司之後,希望2012年搵到真正嘅理由開返間公司。(呢D咪叫捉蟲囉)

9.
2011年d 基金同埋MPF蝕到阿媽都唔認得,2012年可唔可以返家鄉? >_<

10.
繼續追求「外化而內不化」,以「順人而不失己」為目標,當然「虛己以遊世」呢D咁高境界我都未敢高攀,但願能夠拎到幾日長假真金白銀去遊覽世界其他地方更加適合。

Written by bearyung

January 25th, 2012 at 1:44 am

Posted in 12劃

Leave a Reply