米高宅生活字典

食法國菜唔一定要去高級商場或者中環，起工廠大廈林立嘅新蒲崗，一個大家以為只會有大家樂、大快活同埋「快加好」等藍領食堂嘅地方，一樣有超水準嘅法國菜。

為大家介紹嘅係 Cafe Le Must ，座落於新蒲崗麗斯戲院附近嘅一間小餐廳，店舖面積真係唔大，6 張 4 人檯已經冇乜位剩。 唔好以為食法國菜就一定會好貴，Ｄ碟大得黎Ｄ菜又好細，呢間餐廳完全唔係咁。 $138 的一個 set dinner, 已經有齊頭盤、主菜、甜品、湯同埋飲品。只要加少少錢（好似係 $20），就可以將頭盤轉做羊架或者鵝肝。

個鵝肝真係物超所值，面層煎得甘香鬆化，內裏鮮嫩無比，配上火龍果（唔一定係火龍果，睇廚師配搭）後起了消除油膩嘅作用。將一少塊鵝肝放在火龍果下一齊放進口內，鵝肝慢慢溶化，甘、香、滑、甜等感覺同一時間沖激著舌頭上每一個味蕾，真係唔捨得吞下。可惜的是鵝肝實在太滑，一下子已經溶到喉嚨內，但是那香味力久不散，令人回味無窮。

餐湯也是值得一讚，我同 Taylor 點的那個蕃茄雞肉湯，初時以為會好似出面個Ｄ菜湯咁將蕃茄攪爛再放入其他配料，做成一碗紅色的湯，但原來係另一回事，佢地嘅蕃茄雞肉湯係用原個大蕃茄，剝皮後再起核（所花嘅功夫已經值晒！），再放下雞肉煮成的。湯很清，但很甜，沒有出面其他餐廳果Ｄ茄醬味，係好簡單的蕃茄芳香清甜同埋雞肉嘅甜味，感覺到是無添加的誠意之作。

其他食物都好好味，好有特式。大家可以去逐一品嘗。 仲有就係佢地嘅服務，真係冇得彈，入面Ｄ人好 nice，你對餐牌上面嘅食物有乜唔明佢地都會好樂意咁解釋俾你聽，由材料、烹調方法到食物嘅味道同埋獨特之處都解釋得好詳細。佢地起廚房出口隔離擺左張檯，檯上面擺放左手提卡式爐同埋好多唔同種類嘅酒，有好多菜式都係即席為你炮製，你可以一邊欣賞廚師嘅手勢，一邊食美味嘅法國菜，在休閒嘅夜晚好好享受呢程超值嘅法國之旅。

地址: 新蒲崗衍慶街地下49號
電話: 2321-8515
菜式: 法國菜
消費: 每人 $101-$150

（注：餐廳日都有唔同嘅廚師推介，配額得幾個，真係手快有手慢冇，經常都會有意外驚喜的！）